وفاقی محتسب برائے انسدادِ ہراسیت (فوسپاہ) نے زچگی کی چھٹیوں کے دوران خاتون ملازمہ کو ملازمت سے فارغ کرنے پر ایک نجی ادارے کے خلاف فیصلہ سناتے ہوئے 12 لاکھ روپے جرمانہ عائد کر دیا۔
فوسپاہ کی سربراہ فوزیہ وقار کی جانب سے جاری فیصلے میں نجی ادارے کو جرمانے کے علاوہ مؤثر اصلاحی اقدامات نافذ کرنے کی ہدایت بھی کی گئی ہے۔ ادارے کو شکایت کنندہ خاتون کے خلاف کسی بھی قسم کی انتقامی کارروائی سے باز رہنے کا حکم دیا گیا ہے۔
فوسپاہ کے مطابق متاثرہ خاتون اکاؤنٹنگ شعبے میں خدمات انجام دے رہی تھیں، تاہم منظور شدہ زچگی کی چھٹی کے دوران انہیں ایک فون کال کے ذریعے ملازمت سے برطرف کر دیا گیا۔ فیصلے میں قرار دیا گیا کہ زچگی کی رخصت کے دوران کسی خاتون کو نوکری سے نکالنا نہ صرف نقصان دہ سلوک ہے بلکہ قانون کے تحت صنفی امتیاز اور نفسیاتی ہراسگی کے زمرے میں بھی آتا ہے۔
