افغانستان میں طالبان کے آنے کے بعد بلوچستان،خیبر پختونخوا میں دہشتگردی میں اضافہ ہوا ہے: بلاول بھٹو زرداری

پاکستان پیپلز پارٹی کے چیئرمین بلاول بھٹو زرداری نے کہا ہے کہ افغانستان میں طالبان کے اقتدار میں آنے کے بعد بلوچستان اور خیبر پختونخوا میں دہشت گردی کے واقعات میں اضافہ ہوا ہے۔کراچی میں صحافیوں سے گفتگو کرتے ہوئے ان کا کہنا تھا کہ بھارت کھلے عام دہشت گرد گروہوں کی مالی معاونت کرتا ہے اور ہم اس معاملے کو عالمی سطح پر اجاگر کر رہے ہیں۔ انہوں نے مزید کہا کہ پاکستان سعودی عرب کے ساتھ دفاعی معاہدے کا خیر مقدم کرتا ہے۔سیلاب متاثرین کے حوالے سے بات کرتے ہوئے بلاول بھٹو نے کہا کہ پنجاب اور خیبر پختونخوا میں سیلاب کے باعث تاریخی نقصان ہوا۔ انہوں نے وضاحت کی کہ وہ وفاق پر تنقید نہیں کر رہے بلکہ یہ اپیل ہے کہ متاثرین کی امداد کے لیے عالمی سطح پر آواز بلند کی جائے۔چیئرمین پیپلز پارٹی نے پنجاب حکومت کی جانب سے سیلاب متاثرین کی مدد کو سراہتے ہوئے کہا کہ کئی علاقوں میں اب تک امداد نہیں پہنچی۔ ان کا کہنا تھا کہ جنوبی پنجاب کے عوام کا کیا قصور ہے کہ ان کی مدد بے نظیر انکم سپورٹ پروگرام کے ذریعے نہیں کی جارہی؟