افغانستان کی بلا اشتعال فائرنگ کے جواب میں پاک فوج کی شدید جوابی کارروائی،متعدد افغان فوجی ہلاک،لاشیں اور پوسٹیں چھوڑ کر فرار

سیکیورٹی ذرائع کے مطابق افغانستان کی جانب سے بلا اشتعال فائرنگ کے جواب میں پاکستانی فورسز نے مؤثر اور شدید جوابی کارروائی کرتے ہوئے متعدد افغان فوجیوں کو ہلاک کر دیا اور خارجی حملہ آورتشکیلات کو تتر بتر کر دیا۔ ذرائع نے بتایا کہ کئی افغان پوسٹیں خارجیوں کو کور فائر دینے میں ناکام رہیں اور اُنہیں بھاری نقصان پہنچا۔
اطلاعات کے مطابق متعدد افغان چوکیوں اور خارجی تشکیلوں کو بھی سخت نقصانات پہنچے ہیں۔ سیکیورٹی ذرائع نے مزید کہا کہ انٹرنل افغان حکومت کے سرپرستی یافتہ علاقوں میں خوارج اور داعش کے ٹھکانوں کو موثر طریقے سے نشانہ بنایا جا رہا ہے۔پاک فوج نے اس آپریشن میں آرٹلری، ٹینک، ہلکے اور بھاری ہتھیاروں کے علاوہ فضائی وسائل اور ڈرونز بھی استعمال کیے، جبکہ مبینہ طور پر ان ہیڈ کوارٹرز کو بھی نشانہ بنایا جا رہا ہے جن پر دعویٰ ہے کہ وہ داعش اور فتنۂ خوارج کو پناہ دیتے رہے ہیں۔