روسی سلامتی کونسل کے سیکریٹری سرگئی شویگو نے الزام عائد کیا ہے کہ مغربی طاقتیں روس کو ٹکڑوں میں تقسیم کرنے کی منصوبہ بندی کر رہی ہیں تاکہ وہ مختلف حصوں پر غلبہ حاصل کر سکیں۔
غیر ملکی خبر ایجنسی کے مطابق شویگو نے اپنے بیان میں کہا کہ مغرب کی کوشش ہے کہ روسی سلطنت اور سوویت یونین کو ’’قابض‘‘ یا ’’استعماری‘‘ قوت کے طور پر پیش کیا جائے، تاہم ان کی یہ کوششیں ناکام ثابت ہوں گی۔
شویگو کے مطابق موجودہ روسی حکومت کا سب سے بڑا مقصد ملک کے اندر موجود مختلف نسلی گروہوں کے درمیان اتحاد، ہم آہنگی اور امن کو مضبوط بنانا ہے۔
انہوں نے کہا کہ روس، امریکہ کے برعکس، مختلف اقوام کے درمیان پرامن روابط اور باہمی احترام کی ایک بہترین مثال ہے، اور مغرب کے پروپیگنڈے کے باوجود روس اپنے اتحاد اور خودمختاری کے تحفظ کے لیے پرعزم ہے۔
