پاکستان کرکٹ ٹیم کے وکٹ کیپر بیٹر محمد رضوان نے پاکستان کرکٹ بورڈ کی جانب سے پیش کیے گئے سینٹرل کنٹریکٹ پر دستخط کرنے سے انکار کر دیا ہے اور بورڈ کے سامنے اپنے مطالبات رکھ دیے ہیں۔
ذرائع کے مطابق پی سی بی نے حال ہی میں 30 قومی کھلاڑیوں کو سینٹرل کنٹریکٹس کی پیشکش کی تھی، جن میں محمد رضوان کو 10 دیگر کرکٹرز کے ساتھ بی کیٹیگری میں شامل کیا گیا تھا۔
ذرائع کا کہنا ہے کہ اس بار سینٹرل کنٹریکٹس کی اے کیٹیگری میں کسی بھی کھلاڑی کو شامل نہیں کیا گیا، جبکہ بی، سی اور ڈی کیٹیگریز میں کھلاڑیوں کو ان کی کارکردگی اور سینئرٹی کی بنیاد پر تقسیم کیا گیا تھا۔
ذرائع کے مطابق محمد رضوان نے ابھی تک اپنے کنٹریکٹ پر دستخط نہیں کیے جبکہ دیگر تمام کھلاڑیوں نے معاہدے پر دستخط مکمل کر لیے ہیں۔ رضوان نے دستخط سے قبل چند شرائط اور مطالبات پی سی بی کے سامنے رکھے ہیں جن پر تاحال اتفاق نہیں ہو سکا۔
ذرائع کا کہنا ہے کہ پی سی بی نے قومی وکٹ کیپر بیٹر کے مطالبات کو منظور کرنے سے انکار کر دیا ہے اور اس وقت ان کے مطالبات تسلیم کیے جانے کا کوئی امکان نہیں۔
محمد رضوان کے اس فیصلے کے بعد پی سی بی اور کھلاڑی کے درمیان معاملات میں سرد مہری پیدا ہو گئی ہے، تاہم بورڈ کی جانب سے ابھی تک اس حوالے سے کوئی باضابطہ بیان جاری نہیں کیا گیا۔
