دوحہ میں پاکستان کی خاتونِ اوّل آصفہ بھٹوزرداری نےقطر فاؤنڈیشن میں شیخہ موزا بنت ناصر سے ملاقات کی، جس میں تعلیم، صحت، اختراع اور خواتین کے بااختیار ہونے کے شعبوں میں تعاون پر تبادلہ خیال کیا گیا۔
خاتونِ اوّل آصفہ بھٹو زرداری نے شیخہ موزا بنت ناصر کی تعلیم اور انسانی ترقی کے فروغ میں بصیرت افروز قیادت کو خراجِ تحسین پیش کیا اور ایجوکیشن ابوو آل (EAA) پروگرام کے تحت پاکستان میں 13 لاکھ سے زائد بچوں کو تعلیم کی فراہمی میں ان کی خدمات کو سراہا۔
انہوں نے پاکستان کی جامعات اور قطر فاؤنڈیشن کے درمیان تعلیمی اشتراک کو مزید فروغ دینے کی تجویز بھی پیش کی۔
شیخہ موزا بنت ناصر نے پاکستانی طلبہ کی کارکردگی اور تخلیقی صلاحیتوں کی تعریف کی، جبکہ خاتونِ اوّل نے ان کے فلسطین کے حق میں مؤقف اور غزہ میں اسرائیلی مظالم کی مذمت کو سراہا۔
ملاقات کے اختتام پر دونوں رہنماؤں نے تعلیم، خواتین کے بااختیار بنانے اور سماجی شمولیت کے فروغ کے مشترکہ عزم کا اعادہ کیا۔
