فیلڈ مارشل سید عاصم منیر سے رائل سعودی لینڈ فورسز کے کمانڈر لیفٹیننٹ جنرل فہد بن سعود الجوہانی نے جنرل ہیڈ کوارٹرز راولپنڈی میں ملاقات کی، جس میں پاکستان اور سعودی عرب کے درمیان دفاعی تعاون مزید مضبوط کرنے پر اتفاق کیا گیا۔
آئی ایس پی آر کے مطابق ملاقات میں دفاعی تعاون، علاقائی سلامتی اور باہمی دلچسپی کے امور پر تفصیلی گفتگو ہوئی۔ دونوں عسکری قیادتوں نے پاکستان اور سعودی عرب کے درمیان طویل المدتی اور اسٹریٹجک عسکری تعلقات کو مزید فروغ دینے کے عزم کا اعادہ کیا۔
فیلڈ مارشل سید عاصم منیر نے تربیت، کیپسٹی بلڈنگ اور انٹیلی جنس شیئرنگ جیسے شعبوں میں تعاون کو وسعت دینے کی ضرورت پر زور دیتے ہوئے پاکستان اور سعودی عرب کے مضبوط دفاعی اشتراک پر اطمینان کا اظہار کیا۔
سعودی کمانڈر نے پاک فوج کی پیشہ ورانہ صلاحیتوں اور علاقائی امن کے لیے پاکستان کے کردار کو سراہا۔ ملاقات سے قبل انہیں جی ایچ کیو آمد پر گارڈ آف آنر پیش کیا گیا۔
بعد ازاں بحرین نیشنل گارڈ کے کمانڈر جنرل شیخ محمد بن عیسیٰ بن سلمان الخلیفہ نے بھی آرمی چیف سے ملاقات کی۔ اس ملاقات میں پاکستان اور بحرین کے درمیان دفاعی تعاون، علاقائی امن و استحکام اور باہمی دلچسپی کے امور پر تبادلہ خیال ہوا۔
اعلامیے کے مطابق دونوں رہنماؤں نے قریبی عسکری تعلقات کو مزید مضبوط بنانے کے عزم کا اعادہ کیا۔ بحرینی کمانڈر نے پاک فوج کی پیشہ ورانہ مہارت اور خطے میں امن کے لیے اس کے کردار کو خراجِ تحسین پیش کیا۔ فیلڈ مارشل عاصم منیر نے یقین دہانی کرائی کہ پاکستان ہر شعبے میں بحرین کے ساتھ تعاون جاری رکھے گا۔
ملاقاتیں خوشگوار ماحول میں ہوئیں اور مشترکہ دفاعی اقدامات کو فروغ دینے پر مکمل اتفاق کیا گیا۔
