ایرانی وزارت خارجہ کے ترجمان اسماعیل بقائی نے اعلان کیا ہے کہ تہران افغانستان کی تازہ ترین صورتحال پر بات چیت اور مشاورت کے لیے ایک علاقائی سربراہی اجلاس کی میزبانی کرے گا۔
بقائی نے اس موقع پر کہا کہ ایران اپنے ہمسایہ ممالک بشمول پاکستان اور افغانستان کے ساتھ مسلسل سفارتی رابطوں کو اہمیت دیتا ہے اور خطے میں سلامتی و استحکام کو اپنی کلیدی ترجیح قرار دیتا ہے۔
انہوں نے کہا کہ تہران علاقائی ریاستوں کے درمیان کشیدگی کم کرنے اور باہمی افہام و تفہیم کو فروغ دینے کے لیے کوئی کسر نہیں چھوڑے گا۔
ترجمان کے مطابق یہ سربراہی اجلاس ہمسایہ ممالک اور دیگر علاقائی کرداروں کے ساتھ متعدد سطحوں پر جاری وسیع مشاورت کا اختتامی مرحلہ ہوگا اور اس سے خطے میں تعاون بڑھانے اور تناؤ کو کم کرنے میں مدد ملے گی۔
آئندہ ہفتے تہران میں ہونے والے اس اجلاس میں پاکستان، تاجکستان، ازبکستان، ترکمانستان، چین اور روس کے افغان امور کے ذمہ دار نمائندے شرکت کریں گے، جبکہ ایرانی وزارت خارجہ اس کی میزبانی کرے گی۔
