پاکستان اور کینیڈا نے زرعی شعبے میں تعاون کے فروغ پر اتفاق کیا ہے۔ وفاقی وزیر برائے غذائی تحفظ رانا تنویر حسین اور کینیڈین ہائی کمشنر طارق علی خان کے درمیان ملاقات میں دونوں ممالک نے زرعی ترقی، جدت اور غذائی تحفظ کے میدان میں شراکت داری بڑھانے کے عزم کا اظہار کیا۔
اجلاس میں ہائبرڈ بیجوں کی تیاری، لائیو اسٹاک کی افزائش اور فیڈ فارمولیشن کے شعبوں میں تعاون بڑھانے پر غور کیا گیا۔ وفاقی وزیر نے پاکستان میں زرعی مشینری کی مقامی تیاری کے لیے مشترکہ منصوبوں کی تجویز بھی پیش کی۔
انہوں نے کہا کہ کینولا کی کاشت کے فروغ سے نہ صرف زرعی پیداوار میں اضافہ ممکن ہوگا بلکہ کسانوں کی آمدنی میں بہتری اور عالمی منڈیوں تک رسائی کے مواقع بھی پیدا ہوں گے۔ کینیڈا کے ساتھ شراکت داری سے پاکستان کی زرعی برآمدات کو عالمی سطح پر فروغ ملے گا۔
دونوں ممالک نے سرٹیفکیشن، مارکیٹ تک رسائی اور تکنیکی تعاون کے لیے ایک مشترکہ ورکنگ گروپ تشکیل دینے پر بھی اتفاق کیا۔ ایس آئی ایف سی کی مؤثر پالیسیوں نے غیرملکی سرمایہ کاروں کے اعتماد کو بڑھایا ہے، جو ملکی معیشت کے استحکام میں اہم کردار ادا کر رہی ہیں۔
