گوادر انسٹیٹیوٹ آف ٹیکنالوجی پاک فوج کی کاوشوں سے گوادر کے نوجوانوں کے لیے عالمی معیار کی تعلیم و تربیت کا ایک نمایاں مرکز بن چکا ہے۔
2005 میں قائم ہونے والا یہ ادارہ اب تک سیکڑوں ہنر مند طلبہ و طالبات کو عملی اور تکنیکی تربیت فراہم کر چکا ہے۔ حال ہی میں جنرل آفیسر کمانڈنگ گوادر ڈویژن نے ادارے کے ہونہار طلبہ و طالبات سے خصوصی ملاقات کی، جس میں انہوں نے نوجوانوں کے جذبے اور عزم کو سراہا۔
جی او سی گوادر ڈویژن کا کہنا تھا کہ یہاں کے طلبہ بین الاقوامی معیار کی تکنیکی تعلیم حاصل کر رہے ہیں اور یہی نوجوان پاکستان کے روشن مستقبل کے معمار ہیں۔
انہوں نے اس بات پر زور دیا کہ نوجوانوں کا کردار وطن کی تعمیر و ترقی میں مرکزی حیثیت رکھتا ہے، اور تعلیم کے ساتھ دیانتداری، خلوصِ نیت اور محنت ہی ایک مضبوط پاکستان کی ضمانت ہیں۔
انہوں نے طلبہ کو ہدایت کی کہ وہ اپنی صلاحیتوں کو علم و تحقیق کے فروغ اور ملک کی ترقی میں صرف کریں، کیونکہ پاکستان کا مستقبل انہی باصلاحیت نوجوانوں سے وابستہ ہے جو اپنی کامیابی کے ساتھ وطن کی خدمت کا عزم رکھتے ہیں۔
