صدر آصف علی زرداری نے دوحہ میں امیرِ قطر شیخ تمیم بن حمد الثانی سے ملاقات کی جس میں دونوں رہنماؤں نے پاکستان اور قطر کے تاریخی و برادرانہ تعلقات کو مزید مضبوط بنانے کے عزم کا اظہار کیا۔
ملاقات کے دوران امیرِ قطر نے صدر زرداری کی جانب سے پاکستان کے دورے کی دعوت قبول کر لی۔ شیخ تمیم بن حمد الثانی نے کہا کہ قطر کو پاکستان اور اس کی کامیابیوں پر فخر ہے، اور ملک میں مقیم پاکستانی برادری کے کردار کو سراہتے ہوئے ان کی تعداد میں اضافہ کرنے کی خواہش ظاہر کی۔
امیرِ قطر نے پاکستان اور سعودی عرب کے درمیان حالیہ دفاعی معاہدے کو خوش آئند اور بروقت قرار دیا اور کہا کہ پاکستان ایک منفرد حیثیت رکھتا ہے جو چین، مغرب اور خلیجی ممالک کے ساتھ بیک وقت مثبت تعلقات رکھتا ہے۔
صدر آصف زرداری نے امیرِ قطر کو حکومتِ پاکستان اور عوام کی جانب سے نیک تمناؤں کا پیغام پہنچایا اور قطر کی ترقی کے ساتھ امیرِ قطر کی بصیرت افروز قیادت کو سراہا۔
انہوں نے دونوں ممالک کے درمیان دفاع، دفاعی پیداوار، زراعت اور غذائی تحفظ کے شعبوں میں تعاون بڑھانے کی تجویز پیش کی، جس پر امیرِ قطر نے رضامندی ظاہر کرتے ہوئے متعلقہ حکام کو فوری رابطوں کی ہدایت کی۔
صدر زرداری نے دوحا مذاکرات کی میزبانی اور افغانستان کے معاملے میں قطر کے کردار کو سراہا، جبکہ امیرِ قطر نے امید ظاہر کی کہ پاکستان اور افغانستان اپنے اختلافات دور کر کے موجودہ چیلنجز پر قابو پا لیں گے۔
ملاقات میں چیئرمین پیپلز پارٹی بلاول بھٹو زرداری اور قطر میں تعینات پاکستانی سفیر بھی شریک تھے۔
