وزیر دفاع خواجہ محمد آصف نے واضح کیا ہےکہ پاکستان دہشت گردانہ کارروائیوں کا بھرپور جواب دے گا اور دہشت گردانہ حرکتیں نہ سرحدی علاقوں میں اور نہ ہی شہری علاقوں میں برداشت کی جائیں گی۔
اسلام آباد میں کچہری دھماکے پر صحافیوں سے گفتگو میں انہوں نے کہا کہ اندازہ تھا کہ ہمیں دباؤ میں لانے کے لیے اس قسم کی حرکت کی جائے گی اور اب تک دہشت گردی زیادہ تر سرحدی علاقوں تک محدود رہی مگر اسلام آباد میں حملہ ریاست کو ایک واضح پیغام سمجھنا چاہیے۔
خواجہ آصف کا کہنا تھا کہ افغان حکومت افغانستان میں بیٹھے دہشت گردوں کی پشت پناہی کر رہی ہے اور اس حملے سے پیغام دیا گیا کہ ہمارے تمام علاقے ان کے نشانے پر ہیں۔
انہوں نے کہا کہ عوام اور افواج دہشت گردی کے خلاف قربانیاں دے رہے ہیں اور ریاست کو اس صورتحال پر سنجیدگی سے غور کرنا ہوگا۔
وزیر دفاع نے مزید کہا کہ کالعدم ٹی ٹی پی کے کئی عناصر کابل میں موجود ہیں اور کابل حکومت کس طرح ان کی ذمہ داری قبول نہ کرنے کا دعویٰ کر سکتی ہے، اس پر بھی غور و فکر ضروری ہے۔
