صدرِ مملکت آصف علی زرداری اور وزیراعظم محمد شہباز شریف کے درمیان ایوانِ صدر اسلام آباد میں ایک اہم ملاقات ہوئی، جس میں ملک کی مجموعی سیاسی اور سیکیورٹی صورتحال پر تفصیلی غور و خوض کیا گیا۔
ایوانِ صدر کے ترجمان کے مطابق، دونوں رہنماؤں نے دہشت گردی کے حالیہ واقعات کی سخت مذمت کرتے ہوئے اس بات پر اتفاق کیا کہ غیر ملکی حمایت یافتہ دہشت گردوں اور ان کے سہولت کاروں کے خلاف فیصلہ کن کارروائیاں اس وقت تک جاری رہیں گی جب تک ملک سے دہشت گردی کا مکمل خاتمہ نہیں ہو جاتا۔
ملاقات میں چیئرمین سینیٹ سید یوسف رضا گیلانی، اسپیکر قومی اسمبلی سردار ایاز صادق، اور وفاقی وزراء سید محسن رضا نقوی، چوہدری سالک حسین، اعظم نذیر تارڑ، خالد حسین مگسی اور عبدالعلیم خان بھی شریک تھے۔
یہ ملاقات ملک میں امن و استحکام کے قیام اور قومی قیادت کے باہمی تعاون کے عزم کی عکاس ہے۔
