ایران نے عالمی جوہری ادارے آئی اے ای اے کے ساتھ ستمبر میں قاہرہ میں طے پانے والے معاہدے کو باضابطہ طور پر ختم کرنے کا اعلان کر دیا ہے۔
ایرانی خبر ایجنسی کے مطابق ایرانی وزیرِ خارجہ عباس عراقچی نے ڈائریکٹر جنرل آئی اے ای اے رفائل گروسی کو بھیجے گئے سرکاری مراسلے میں واضح کیا کہ یہ سمجھوتہ اب قابلِ اعتبار نہیں رہا اور اسے ختم تصور کیا جائے۔
مراسلے میں کہا گیا ہے کہ سلامتی کونسل میں تین یورپی ممالک کی جانب سے منسوخ شدہ قراردادوں کی بحالی کے غیر قانونی اقدام نے قاہرہ معاہدے کی عملی حیثیت ختم کر دی ہے، جس کے بعد یہ سمجھوتہ ایران اور عالمی ایٹمی ادارے کے درمیان تعلقات اور تعاون کی بنیاد نہیں رہ سکتا۔
ایرانی وزیرِ خارجہ کے مطابق تینوں یورپی ممالک کے اقدامات عالمی ادارے کی حیثیت اور آزادی کو نقصان پہنچا رہے ہیں اور اس کے ساتھ تعاون کے عمل کو بھی بری طرح متاثر کر رہے ہیں۔
