آج بنوں میں ایک افسوسناک واقعے میں میران شاہ کے اسسٹنٹ کمشنر شاہ ولی کی گاڑی پر فائرنگ کی گئی، جس کے نتیجے میں وہ خود، دو پولیس اہلکار اور کھیتوں میں کام کرنے والا ایک شہری شہید ہوگئے۔ دو پولیس اہلکار زخمی بھی ہوئے۔
ڈی آئی جی بنوں سجاد خان کے مطابق حملہ اچانک کیا گیا اور فائرنگ کے بعد حملہ آوروں نے گاڑی کو آگ لگا دی۔ واقعے کے بعد علاقے کو گھیرے میں لے کر سرچ آپریشن شروع کر دیا گیا ہے، جبکہ سیکیورٹی ہائی الرٹ پر ہے۔
اسسٹنٹ کمشنر کے سیکریٹری بلال ثاقب نے بتایا کہ واقعہ صبح تقریباً 10 بجے پیش آیا جب شاہ ولی عدالت میں پیشی کے لیے جا رہے تھے۔ انہیں مامش خیل کے علاقے مسوم آباد کے قریب گھات لگا کر نشانہ بنایا گیا۔
