واشنگٹن (ڈیلی پاکستان آن لائن) – امریکی صدر ڈونلڈ ٹرمپ نے خبردار کیا ہے کہ وہ ان ممالک پر تجارتی ٹیرف عائد کرنے پر غور کر سکتے ہیں جو گرین لینڈ سے متعلق ان کے منصوبوں کی حمایت نہیں کریں گے۔
گرین لینڈ، جو نیٹو کے رکن ملک ڈنمارک کا حصہ ہے، صدر ٹرمپ کے مطابق امریکہ کی قومی سلامتی کے لیے انتہائی اہمیت رکھتا ہے۔
وائٹ ہاؤس میں صحت کے موضوع پر منعقدہ ایک گول میز اجلاس کے دوران صدر ٹرمپ نے کہا کہ اگر دیگر ممالک گرین لینڈ کے معاملے میں امریکہ کے ساتھ تعاون نہیں کریں گے تو ان پر سخت تجارتی اقدامات کیے جا سکتے ہیں۔
انہوں نے زور دیا کہ گرین لینڈ کی جغرافیائی اہمیت اور اس کے وسائل امریکہ کے قومی سلامتی کے تقاضوں سے جڑے ہیں، اور اسی بنیاد پر وہ اس معاملے میں کسی بھی سخت فیصلہ لینے سے نہیں ہچکچائیں گے۔
ٹرمپ کے اس اعلان سے عالمی تجارتی اور سیاسی حلقوں میں گرین لینڈ کی اہمیت اور امریکہ کی اس حوالے سے حکمت عملی پر بحث شدت اختیار کر گئی ہے۔
