مقامی عدالت نے معروف یوٹیوبر سعد الرحمٰن عرف ڈکی اور ان کی اہلیہ عروب جتوئی سمیت دیگر ملزمان پر آن لائن جوئے کی تشہیر کے مقدمے میں فردِ جرم عائد کر دی۔
ضلع کچہری لاہور میں جوڈیشل مجسٹریٹ نعیم وٹو نے کیس کی سماعت کی، جس دوران سعد الرحمٰن، عروب جتوئی اور دیگر ملزمان عدالت میں پیش ہوئے۔ عدالت نے تمام نامزد ملزمان پر فردِ جرم عائد کی تاہم ملزمان نے صحتِ جرم سے انکار کرتے ہوئے الزامات کو مسترد کر دیا۔
عدالت نے آئندہ سماعت پر استغاثہ کے گواہوں کو طلب کرتے ہوئے کیس کی مزید کارروائی 23 فروری تک ملتوی کر دی۔
یاد رہے کہ نیشنل سائبر کرائم انویسٹی گیشن ایجنسی (این سی سی آئی اے) نے سعد الرحمٰن عرف ڈکی اور دیگر کے خلاف مقدمہ درج کر رکھا ہے، جس میں ان پر آن لائن جوا ویب سائٹس کی تشہیر اور پروموشن کا الزام عائد کیا گیا ہے۔
