وزیر خزانہ محمد اورنگزیب نے خبردار کیا ہے کہ خطے میں بڑھتی ہوئی کشیدگی اور جنگی حالات کے باعث توانائی کے بنیادی ڈھانچے کو متاثر ہونے کا خدشہ ہے۔
میڈیا سے گفتگو کرتے ہوئے انہوں نے کہا کہ ملک کے وسائل محدود ہیں تاہم حکومت کو امید ہے کہ اپریل تک سپلائی کی صورتحال بہتر رہے گی۔
وزیر خزانہ نے کہا کہ محدود وسائل کے پیش نظر پائیدار اور دیرپا حل ناگزیر ہے، اور حکومت نے عوام پر بوجھ کم رکھنے کے لیے پیٹرولیم مصنوعات پر 69 ارب روپے کا مالی بوجھ خود برداشت کیا ہے۔
ان کا کہنا تھا کہ توانائی کے شعبے میں ڈیمانڈ منیجمنٹ اور بچت کے اقدامات پر غور کیا جا رہا ہے، جبکہ مستحق طبقات کے لیے ٹارگٹڈ ریلیف پیکیج بھی تیار کیا جا رہا ہے۔
محمد اورنگزیب نے عوام اور کاروباری برادری کو تجاویز دینے کی دعوت دیتے ہوئے کہا کہ مشترکہ کوششوں سے ہی موجودہ چیلنجز کا مؤثر حل ممکن ہے۔
