برلن: جرمنی کے وزیر خارجہ جوہان ویڈے فول نے انکشاف کیا ہے کہ امریکا اور ایران کے درمیان بالواسطہ رابطے ہو چکے ہیں اور دونوں ممالک کے درمیان براہ راست مذاکرات کی تیاریاں جاری ہیں۔
میڈیا سے گفتگو کرتے ہوئے جرمن وزیر خارجہ کا کہنا تھا کہ ان کی معلومات کے مطابق دونوں ممالک کے نمائندوں کے درمیان جلد ملاقات متوقع ہے، جو بظاہر پاکستان میں منعقد ہو سکتی ہے۔
انہوں نے مزید کہا کہ حالیہ پیش رفت اس بات کی نشاندہی کرتی ہے کہ دونوں فریق کشیدگی میں کمی اور سفارتی حل کی جانب پیش رفت کے خواہاں ہیں۔ تاہم اس حوالے سے حتمی تاریخ اور مقام کا باضابطہ اعلان ابھی تک سامنے نہیں آیا۔
تجزیہ کاروں کے مطابق اگر یہ ملاقات پاکستان میں ہوتی ہے تو یہ خطے میں پاکستان کے سفارتی کردار کو مزید مضبوط بنانے کا سبب بن سکتی ہے، جبکہ امریکا اور ایران کے درمیان کشیدگی کم کرنے میں بھی اہم پیش رفت ثابت ہو سکتی ہے
