بھارتی ریاست مہاراشٹراکے ضلع تھانے میں ایک افسوسناک ٹریفک حادثے میں 11 افراد جاں بحق اور 2 زخمی ہو گئے۔
پولیس کے مطابق حادثہ آج موربد کے علاقے میں واقع رائٹا پل پر پیش آیا، جب ایک وین، جو کلیان سے موربد کی طرف جا رہی تھی، مخالف سمت سے آنے والے سیمنٹ مکسر سے ٹکرا گئی۔
حادثے کی شدت اس قدر زیادہ تھی کہ دونوں گاڑیاں بری طرح تباہ ہو گئیں۔ حکام کا کہنا ہے کہ وین میں متعدد مسافر سوار تھے، جن میں آٹھ مرد اور تین خواتین موقع پر ہی جاں بحق ہو گئیں۔
زخمیوں کو فوری طور پر قریبی اسپتال منتقل کیا گیا جہاں ان کی حالت تشویشناک بتائی جا رہی ہے۔ مقامی انتظامیہ کے مطابق زخمیوں کو الحسن نگر کے اسپتال میں طبی امداد دی جا رہی ہے۔
کشمیر میڈیا سروس کی رپورٹ کے مطابق موربد کے تحصیلدار ابھیجیت دیشمکھ نے میڈیا کو بتایا کہ حادثے کی تحقیقات شروع کر دی گئی ہیں تاکہ اصل وجوہات معلوم کی جا سکیں۔
