ایرانی وزیر خارجہ عباس عراقچی نے اپنے حالیہ دورۂ پاکستان کو نہایت سودمند قرار دیتے ہوئے کہا ہے کہ اس دورے کے دوران اسلام آباد میں اعلیٰ عسکری اور سیاسی قیادت کے ساتھ ہونے والی ملاقاتیں انتہائی اہم اور نتیجہ خیز رہیں۔
مسقط پہنچنے کے بعد سوشل میڈیا پلیٹ فارم X (Twitter) پر جاری اپنے بیان میں انہوں نے کہا کہ ایران نے خطے میں جنگ کے مستقل خاتمے اور پائیدار امن کے قیام کے لیے ایک قابلِ عمل سفارتی فریم ورک پیش کیا ہے، تاہم اب اصل بات یہ ہے کہ آیا امریکا واقعی سنجیدگی کے ساتھ سفارتکاری کا راستہ اختیار کرتا ہے یا نہیں۔
انہوں نے پاکستان کی جانب سے خطے میں امن کے فروغ کے لیے کی جانے والی مخلصانہ، برادرانہ اور مثبت کوششوں کو سراہتے ہوئے کہا کہ ایران ان اقدامات کو قدر کی نگاہ سے دیکھتا ہے۔
اپنے دورے کے دوران انہوں نے فیلڈ مارشل عاصم منیر اور وزیراعظم شہباز شریف سے علیحدہ علیحدہ ملاقاتیں کیں، جن میں نہ صرف خطے کی مجموعی صورتحال بلکہ باہمی دلچسپی کے امور اور پاک ایران تعلقات کو مزید مستحکم بنانے پر تفصیلی تبادلہ خیال کیا گیا، جبکہ ان اہم ملاقاتوں میں اعلیٰ حکومتی اور سیکیورٹی حکام نے بھی شرکت کی، جو اس دورے کی اہمیت اور دونوں ممالک کے درمیان قریبی روابط کی عکاسی کرتا ہے۔
