ایرانی خبر رساں ادارے تسنیم نیوز ایجنسی نے ایک عسکری ذریعے کے حوالے سے دعویٰ کیا ہے کہ امریکی افواج نے خلیج میں دو چھوٹی شہری کارگو کشتیوں پر فائرنگ کی، جس کے نتیجے میں 5 شہری جاں بحق ہوگئے۔
رپورٹ کے مطابق یہ واقعہ امریکی دعوؤں کے برعکس پیش آیا، کیونکہ پہلے کہا گیا تھا کہ کارروائی ایرانی پاسدارانِ انقلاب کی کشتیوں کے خلاف کی گئی۔
عسکری ذریعے نے کہا چونکہ پاسدارانِ انقلاب کی کسی جنگی کشتی کو نشانہ نہیں بنایا گیا، اس لیے واضح ہوگیا کہ امریکی جارح افواج نے شہریوں کو لے جانے والی دو چھوٹی کارگو کشتیوں پر حملہ کرکے فائرنگ کی۔
رپورٹ میں بتایا گیا ہے کہ یہ کشتیاں عمان کے علاقے خصب کے ساحل سے ایران کی جانب سفر کر رہی تھیں کہ اسی دوران انہیں نشانہ بنایا گیا۔
ذرائع کے مطابق حملے میں 5 شہری مسافر ہلاک ہوگئے۔عسکری ذریعے نے مزید کہاامریکا کو اس جرم پر ضرور جوابدہ ٹھہرایا جانا چاہیے۔
رپورٹ میں یہ بھی کہا گیا کہ یہ واقعہ امریکی افواج کے جلد بازی اور غیر پیشہ ورانہ رویے کو ظاہر کرتا ہے، جو مبینہ طور پر ایرانی پاسدارانِ انقلاب کی تیز رفتار کشتیوں کے خوف کے باعث سامنے آیا۔
واضح رہے کہ اس حوالے سے امریکی حکام کی جانب سے تاحال کوئی باضابطہ ردعمل سامنے نہیں آیا۔
