واشنگٹن: امریکی وزیرِ جنگ پیٹ ہیگستھ نے آبنائے ہرمز میں تجارتی بحری جہازوں پر حملوں کی صورت میں ایران کو سنگین نتائج کی دھمکی دے دی ہے۔
پریس کانفرنس سے خطاب کرتے ہوئے پیٹ ہیگسیتھ نے کہا کہ ایران کے اس دعوے میں کوئی صداقت نہیں کہ اس کا آبنائے ہرمز پر کنٹرول ہے۔ انہوں نے واضح کیا کہ اگر ایرانی فورسز نے تجارتی جہازوں کو نشانہ بنایا تو انہیں امریکی فوجی طاقت کا سامنا کرنا پڑے گا۔
امریکی وزیر جنگ کے مطابق امریکا ایران کے ساتھ جنگ نہیں چاہتا اور نہ ہی امریکی افواج ایرانی فضائی یا بحری حدود میں داخل ہونے کا ارادہ رکھتی ہیں۔ انہوں نے کہا کہ “پروجیکٹ فریڈم” کا مقصد صرف آبنائے ہرمز کو بحال اور محفوظ بنانا ہے۔
پیٹ ہیگسیتھ نے جاپان اور جنوبی کوریا سے بھی مطالبہ کیا کہ وہ آبنائے ہرمز کو کھولنے اور تجارتی راستوں کے تحفظ کی کوششوں میں امریکا کا ساتھ دیں۔
انہوں نے کہا کہ امریکی فوج کا مقصد خطے میں ایران کے مبینہ غیر قانونی اثر و رسوخ کو ختم کرنا اور تجارتی جہازوں کو محفوظ بنانا ہے۔ ان کے مطابق دنیا کو آگے بڑھ کر آبنائے ہرمز کی ذمہ داری سنبھالنی ہوگی۔
امریکی وزیر جنگ نے مزید کہا کہ ایران کے اقدامات بین الاقوامی تجارتی نظام پر “بھتے” کے مترادف ہیں اور یہ ناقابلِ قبول ہیں، جبکہ کسی بھی حملے کی صورت میں سخت ردعمل دیا جائے گا۔
