ایران کے وزیر خارجہ عباس عراقچی نے سخت لہجے میں خبردار کرتے ہوئے کہا ہے کہ تہران اُن تمام ممالک کو جوابدہ ٹھہرائے گا جو اسرائیل کے ساتھ گٹھ جوڑ کر رہے ہیں۔
عراقچی کا کہنا تھا کہ ایران خطے میں اپنے خلاف ہونے والی کسی بھی سازش یا تعاون کو نظر انداز نہیں کرے گا اور جو ممالک اسرائیل کی حمایت یا مدد کر رہے ہیں، انہیں اپنے اقدامات کے نتائج کا سامنا کرنا پڑ سکتا ہے۔
ایرانی وزیر خارجہ نے مزید کہا کہ موجودہ کشیدہ صورتحال میں بعض طاقتیں خطے کو مزید عدم استحکام کی طرف دھکیل رہی ہیں، جبکہ ایران اپنی سلامتی اور خودمختاری کے تحفظ کے لیے ہر ممکن اقدام کرے گا۔
سیاسی تجزیہ کاروں کے مطابق عراقچی کا یہ بیان ایسے وقت میں سامنے آیا ہے جب مشرقِ وسطیٰ میں ایران اور اسرائیل کے درمیان تناؤ مسلسل بڑھ رہا ہے اور مختلف ممالک کے کردار پر بھی سوالات اٹھائے جا رہے ہیں۔
