ایرانی فوج کی خاتم الانبیا سینٹرل ہیڈکوارٹرز نے امریکا اور اس کے اتحادیوں کو سخت خبردار کرتے ہوئے کہا ہے کہ کسی بھی نئی جارحیت کی صورت میں ایران فوری، فیصلہ کن اور بڑے پیمانے پر جوابی کارروائی کرے گا۔
ایران کی خبر رساں ایجنسی تسنیم کے مطابق خاتم الانبیا ہیڈکوارٹرز کے کمانڈر میجر جنرل علی نے اپنے بیان میں کہا کہ ایرانی مسلح افواج مکمل طور پر تیار ہیں اور اگر دوبارہ حملہ کیا گیا تو جواب دینے کیلئے ’’انگلیاں ٹریگر پر‘‘ ہیں۔
انہوں نے کہا کہ امریکا اور اس کے اتحادی کسی بھی اسٹریٹجک غلطی یا غلط اندازے سے گریز کریں کیونکہ ایران کی فوجی صلاحیتیں ماضی کے مقابلے میں کہیں زیادہ مضبوط ہوچکی ہیں۔
میجر جنرل علی کا کہنا تھا کہ مستقبل میں کسی بھی قسم کی فوجی کارروائی کا ردِعمل پہلے سے زیادہ طاقتور، وسیع اور سخت ہوگا، جس کے نتائج خطے کیلئے سنگین ثابت ہوسکتے ہیں۔
