28 مئی 1998 کے جوہری تجربات کی یاد میں آج ملک بھر میں 28 واں یومِ تکبیر ملی جوش و جذبے کے ساتھ منایا جا رہا ہے، جو پاکستان کی دفاعی تاریخ کا ایک اہم اور فیصلہ کن سنگ میل سمجھا جاتا ہے۔
اس دن پاکستان دنیا کی ساتویں ایٹمی طاقت اور مسلم دنیا کا پہلا ایٹمی ہتھیار رکھنے والا ملک بن گیا۔ یہ تجربات بلوچستان کے ضلع چاغی کے راس کوہ پہاڑوں میں کیے گئے، جن کی قیادت پاکستانی سائنسدانوں ڈاکٹر عبدالقدیر خان اور ڈاکٹر ثمر مبارک مند سمیت ایک ماہر سائنسی ٹیم نے کی۔
یومِ تکبیر اس عزم کی علامت ہے کہ پاکستان نے اپنی علاقائی سالمیت، خودمختاری اور دفاع کے تحفظ کے لیے کسی دباؤ کو قبول کیے بغیر اپنے دفاعی فیصلے خود کیے۔
تاریخی حوالوں کے مطابق سابق وزیراعظم ذوالفقار علی بھٹو نے ایٹمی پروگرام کے آغاز کے موقع پر یہ جرات مندانہ مؤقف اپنایا تھا کہ قوم بھوکی رہ سکتی ہے مگر اپنے دفاع سے دستبردار نہیں ہوگی۔
بعد ازاں، بھارت کے جوہری تجربات کے جواب میں اس وقت کے وزیراعظم محمد نواز شریف نے بین الاقوامی دباؤ کے باوجود پاکستانی جوہری تجربات کی منظوری دے کر ایک اہم دفاعی فیصلہ کیا، جس سے خطے میں طاقت کا توازن قائم ہوا۔
یومِ تکبیر کے موقع پر صدر اور وزیراعظم کی جانب سے قوم کو مبارکباد دی گئی ہے اور 28 مئی 1998 کے ایٹمی دھماکوں کو قومی غیرت، دفاع اور خودداری کی علامت قرار دیا گیا ہے۔
