ایران کے مرکزی ہیڈکوارٹر خاتم الانبیاء کے کمانڈر میجر جنرل علی عبداللہی نے کہا ہے کہ ایرانی مسلح افواج عدل کے قیام، عوامی حقوق کے تحفظ، منظم بدعنوانی کے خاتمے اور ملک میں پائیدار امن و سلامتی کے فروغ کے لیے ہر ممکن تعاون، ہم آہنگی اور معاونت فراہم کرنے کے لیے مکمل طور پر تیار ہیں۔
ہفتہ کے روز عدلیہ کے ہفتے کے موقع پر ایرانی عدلیہ کے سربراہ غلام حسین محسنی اژہ ای کے نام اپنے پیغام میں جنرل علی عبداللہی نے کہا کہ مرکزی ہیڈکوارٹر خاتم الانبیاء اور مسلح افواج کی تمام شاخیں انصاف کے قیام، عوامی حقوق کے تحفظ، منظم خطرات اور بدعنوانی کے خلاف کارروائی، نیز ایران کی طاقت اور دیرپا قومی سلامتی کو مضبوط بنانے کے لیے ہر قسم کے تعاون کے لیے مکمل آمادہ ہیں۔
انہوں نے کہا کہ اسلامی جمہوریہ ایران کے نظامِ حکومت میں عدلیہ حق کی بالادستی، انصاف کی فراہمی، معاشرے میں قانونی تحفظ کو یقینی بنانے اور ریاست کے عوامی اعتماد کے تحفظ میں بنیادی کردار ادا کرتی ہے۔
جنرل علی عبداللہی نے قومی اداروں کے درمیان باہمی تعاون کو وقت کی اہم ضرورت قرار دیتے ہوئے کہا کہ مختلف ریاستی اداروں کے درمیان مؤثر ہم آہنگی سے ملک کے امن و استحکام کو مزید مضبوط بنایا جا سکتا ہے اور ایران کو درپیش مختلف خطرات اور چیلنجز کا مؤثر انداز میں مقابلہ کیا جا سکتا ہے۔
انہوں نے اس عزم کا اعادہ کیا کہ ایرانی مسلح افواج ملک کی سلامتی، خودمختاری اور قومی مفادات کے تحفظ کے لیے ہر سطح پر اپنی ذمہ داریاں ادا کرتی رہیں گی۔
