وفاقی حکومت نے مالی سال 2026-27 کے دوران عوام کے لیے گیس کی قیمتوں میں کمی نہ کرنے کا فیصلہ کیا ہے، حالانکہ آئل اینڈ گیس ریگولیٹری اتھارٹی (اوگرا) نے گیس کمپنیوں کے لیے مقررہ اوسط قیمت میں کمی کی منظوری دی ہے۔
پیٹرولیم ڈویژن کے ایک سینئر عہدیدار کے مطابق اوگرا نے سوئی سدرن اور سوئی ناردرن گیس کمپنیوں کے لیے اوسط مقررہ قیمت 1,793 روپے فی ایم ایم بی ٹی یو سے کم کرکے 1,705 روپے فی ایم ایم بی ٹی یو مقرر کر دی ہے۔
رپورٹس کے مطابق گیس کمپنیوں کے ٹیرف میں کمی کے باوجود حکومت نے فیصلہ کیا ہے کہ مالی سال 2026-27 کے دوران گھریلو اور دیگر صارفین کے لیے گیس کی موجودہ قیمتیں برقرار رکھی جائیں گی، لہٰذا صارفین کو گیس کے نرخوں میں کسی قسم کا ریلیف نہیں ملے گا۔
حکام کا کہنا ہے کہ گیس کی قیمتیں برقرار رکھنے کا مقصد سوئی سدرن اور سوئی ناردرن گیس کمپنیوں کی مالی پوزیشن کو مستحکم بنانا اور شعبے کے مالی استحکام کو یقینی بنانا ہے۔
ذرائع کے مطابق حکومت نے اپنے اس فیصلے سے بین الاقوامی مالیاتی فنڈ (آئی ایم ایف) کو بھی باضابطہ طور پر آگاہ کر دیا ہے۔
