ایران کے وزیر خارجہ عباس عراقچی نے واضح کیا ہے کہ اگر دھمکیوں کا سلسلہ جاری رہا تو حتمی معاہدے پر مذاکرات کا آغاز ممکن نہیں ہوگا۔
سماجی رابطے کی ویب سائٹ پر جاری اپنے بیان میں عباس عراقچی نے کہا کہ لاکھوں ایرانی شہریوں نے آیت اللہ سید علی خامنہ ای کو خراجِ عقیدت پیش کرنے کے لیے ان کے جنازے میں بھرپور شرکت کر کے قومی اتحاد کا مظاہرہ کیا۔
انہوں نے کہا کہ نہ ایرانی عوام اور نہ ہی ایران کی بہادر مسلح افواج کسی بھی قسم کی دھمکی سے مرعوب ہوں گی اور ملک اپنے اصولی مؤقف پر قائم رہے گا۔
ایرانی وزیر خارجہ کا کہنا تھا کہ مفاہمتی یادداشت کی شق نمبر 13 بالکل واضح ہے، جس کے مطابق دھمکیوں کے تسلسل کے دوران حتمی معاہدے پر مذاکرات شروع نہیں کیے جائیں گے۔
عباس عراقچی نے متعلقہ فریق کو مخاطب کرتے ہوئے کہا کہ اگر معاہدے کو آگے بڑھانا ہے تو پہلے اپنے دستخط اور کیے گئے وعدوں کا احترام کیا جائے۔
