اسلام آباد: وزیر اعظم شہباز شریف کی زیر صدارت ہونے والے اجلاس میں میں استعمال ہونے والے ہائی آکٹین فیول پر پٹرولیم لیوی میں بڑا اضافہ کرنے کا فیصلہ کیا گیا ہے۔
اعلامیے کے مطابق ہائی آکٹین فیول پر لیوی 100 روپے سے بڑھا کر 300 روپے فی لیٹر کر دی گئی ہے، جس کے بعد مجموعی لیوی 305 روپے 37 پیسے فی لیٹر ہو گئی ہے، جبکہ اس سے قبل یہ 105 روپے 37 پیسے فی لیٹر تھی۔ نئی قیمت کے بعد ملک میں ہائی آکٹین فیول کی قیمت 535 روپے فی لیٹر تک پہنچ گئی ہے۔
وزیراعظم ہاؤس کے مطابق یہ فیصلہ ویڈیو لنک کے ذریعے ہونے والے اجلاس میں کیا گیا، جس کا مقصد اضافی آمدن حاصل کرنا اور مالی نظم و ضبط کو بہتر بنانا ہے۔
اعلامیے میں واضح کیا گیا ہے کہ عام صارفین کو ریلیف دینے کے لیے ریگولر پیٹرول کی قیمت میں کوئی اضافہ نہیں کیا گیا، جبکہ پبلک ٹرانسپورٹ اور فضائی کرایوں پر بھی اس فیصلے کے اثرات مرتب نہیں ہوں گے۔
مزید کہا گیا ہے کہ اس اقدام سے حکومت کو ماہانہ تقریباً 9 ارب روپے کی بچت ہوگی، جسے عوامی ریلیف کے لیے استعمال کیا جائے گا۔
