کراچی: کھلے مین ہول میں گر کر جاں بحق ہونے والے تین سالہ معصوم ابراہیم کو آہوں اور سسکیوں کے ساتھ سپردِ خاک کر دیا گیا۔ ننھے ابراہیم کی لاش گھر پہنچتے ہی علاقے میں کہرام برپا ہوگیا اور ہر آنکھ اشکبار دکھائی دی۔
ابراہیم کی نمازِ جنازہ شاہ فیصل کالونی نمبر پانچ کی مریم مسجد میں ادا کی گئی، جس میں امیر جماعت اسلامی کراچی منعم ظفر خان، رکنِ سندھ اسمبلی شارق جمال اور بڑی تعداد میں اہلِ علاقہ نے شرکت کی۔ تدفین شاہ فیصل کالونی گیٹ قبرستان میں کی گئی۔
واضح رہے کہ نیپا کے قریب کھلے مین ہول میں گرنے والے معصوم ابراہیم کی لاش 15 گھنٹے کی تلاش کے بعد برآمد ہوئی تھی، جس نے شہری انتظامیہ کی غفلت پر شدید سوالات اٹھا دیے ہیں۔
