بھارتی اداکارہ راکھی ساونت نے ایک تقریب کے دوران مسلم خاتون کا نقاب کھینچنے کے واقعے پر بہار کے وزیر اعلیٰ نتیش کمار کو شدید تنقید کا نشانہ بناتے ہوئے ان سے عوامی طور پر معافی مانگنے کا مطالبہ کر دیا ہے۔
سوشل میڈیا پر جاری اپنے ویڈیو پیغام میں راکھی ساونت نے کہا کہ نتیش کمار نے ایوارڈ دینے کے بہانے ایک مسلمان خاتون کی بے حرمتی کی، جو انتہائی قابلِ مذمت عمل ہے۔
ان کا کہنا تھا کہ وزیر اعلیٰ کو مسلم ثقافت اور روایات کا علم ہونا چاہیے، کیونکہ اسلام میں خواتین کو نقاب کرنے کا حکم دیا گیا ہے اور کسی کو یہ حق حاصل نہیں کہ وہ کسی خاتون کے نقاب کو ہاتھ لگائے۔
راکھی ساونت نے کہا کہ نتیش کمار ایک سینئر سیاستدان ہیں اور ان سے اس قسم کے رویے کی توقع نہیں کی جا سکتی تھی۔
انہوں نے سخت الفاظ میں کہا کہ اگر یہی سلوک ان کے ساتھ کیا جاتا تو انہیں کیسا محسوس ہوتا؟ ایک طرف خواتین کو عزت دینے کی باتیں کی جاتی ہیں اور دوسری طرف ایک خاتون کی تذلیل کی جاتی ہے، جو کسی صورت قابلِ قبول نہیں۔
اداکارہ نے مطالبہ کیا کہ وزیر اعلیٰ نتیش کمار میڈیا کے سامنے اس مسلمان خاتون کو بلا کر اسے بہن قرار دیں اور عوامی سطح پر معافی مانگیں۔
راکھی ساونت نے مزید کہا کہ وہ اتر پردیش اور بہار کا احترام کرتی ہیں، تاہم خواتین کے ساتھ ظلم، بے عزتی اور برقعے کی تذلیل کسی بھی حال میں برداشت نہیں کی جا سکتی۔
