امریکا سے کسی بھی وقت جنگ چھڑ سکتی ہے، ہم تیار ہیں،خاتم الانبیا ہیڈکوارٹرز

ایران نے امریکا کے ساتھ دوبارہ جنگ کے خدشات ظاہر کرتے ہوئے خبردار کیا ہے کہ ایرانی مسلح افواج کسی بھی ممکنہ امریکی کارروائی کا بھرپور جواب دینے کے لیے مکمل طور پر تیار ہیں۔

ایرانی خبر رساں ادارے  فارس نیوز ایجنسی کے مطابق خاتم الانبیا ہیڈکوارٹرز کے بریگیڈیئر جنرل سردار جعفر اسدی نے اپنے بیان میں کہا کہ ماضی کے تجربات سے واضح ہوتا ہے کہ امریکا کسی بھی معاہدے کی مکمل پاسداری نہیں کرتا، اسی لیے دونوں ممالک کے درمیان دوبارہ کشیدگی یا تصادم کے امکانات موجود ہیں۔

انہوں نے کہا کہ موجودہ صورتحال میں نہ صرف ایرانی مسلح افواج بلکہ عوام اور مختلف سیاسی دھڑے بھی متحد ہیں، حتیٰ کہ وہ گروہ بھی جو ماضی میں اختلافات رکھتے تھے، اب قومی مؤقف پر یکجا دکھائی دیتے ہیں۔

یہ بیان ایسے وقت سامنے آیا ہے جب امریکی صدر ڈونلڈ ٹرمپ نے کہا کہ وہ ایران کی حالیہ مذاکراتی تجاویز سے مطمئن نہیں ہیں۔

ایرانی سرکاری میڈیا کے مطابق تہران نے جمعرات کی شام اپنی نئی مسودہ تجویز پاکستان کے حوالے کی، تاہم اس کی تفصیلات تاحال ظاہر نہیں کی گئیں۔

دوسری جانب ایرانی نائب وزیر خارجہ کاظم غریب آبادی نے تہران میں سفارتکاروں سے گفتگو کرتے ہوئے کہا کہ اب فیصلہ امریکا کے ہاتھ میں ہے کہ وہ سفارت کاری کا راستہ اپناتا ہے یا تصادم کی پالیسی جاری رکھتا ہے۔

انہوں نے مزید کہا کہ ایران دونوں امکانات کے لیے مکمل طور پر تیار ہے۔