عرب نشریاتی ادارے الجزیرہ کے مطابق امریکا، پاکستان اور ایران کے درمیان جنگ بندی کے لیے سفارتی رابطے اور مذاکرات جاری ہیں۔
الجزیرہ نے واشنگٹن سے اپنی رپورٹ میں دعویٰ کیا ہے کہ تینوں ممالک کے درمیان مختلف تجاویز پر تبادلہ خیال کیا جا رہا ہے جبکہ اہم ریڈ لائنز پر بھی بات چیت جاری ہے۔
رپورٹ کے مطابق امریکی حکام اس بات پر زور دے رہے ہیں کہ کسی بھی ممکنہ معاہدے سے پہلے ایران کے ایٹمی پروگرام پر پیش رفت ضروری ہے۔ دوسری جانب ایرانی مؤقف ہے کہ مذاکرات سے قبل ایرانی سمندری حدود پر عائد ناکہ بندی ختم کی جائے۔
الجزیرہ کے مطابق سفارتی ذرائع کا کہنا ہے کہ مذاکرات میں پیش رفت کے امکانات روشن ہیں، تاہم کسی بھی اچانک واقعے کے باعث کشیدگی دوبارہ بڑھنے کا خدشہ بھی موجود ہے۔
رپورٹ میں مزید کہا گیا ہے کہ واشنگٹن اور اسرائیلی حلقوں میں دو سے تین ہفتوں کی محدود جنگ کی قیاس آرائیاں بھی زیر گردش ہیں، جس کا مقصد ایران کو اپنی شرائط کے مطابق مذاکرات پر آمادہ کرنا بتایا جا رہا ہے۔
