ایران کی سپاہ پاسداران انقلاب نے ایک بار پھر سخت لہجہ اختیار کرتے ہوئے خبردار کیا ہے کہ دشمن کی کسی بھی جارحیت کا پہلے سے کہیں زیادہ طاقتور، سخت اور فیصلہ کن جواب دیا جائے گا۔
دارالحکومت تہران کے دفاع کی ذمہ دار سپاہ پاسداران کے "محمد رسول اللہ” کور کے کمانڈر حسن حسن زادہ نے کہا ہے کہ ایرانی مسلح افواج اب ماضی کے مقابلے میں کہیں زیادہ تیار اور مضبوط پوزیشن میں ہیں۔
ایرانی خبر رساں ادارے کے مطابق حسن زادہ نے اپنے بیان میں کہا کہ اگر دشمن نے کسی بھی قسم کی غلطی یا حملے کی کوشش کی تو ایران کی مسلح افواج ایسا “سخت، تکلیف دہ اور فیصلہ کن جواب” دیں گی جس کے اثرات پہلے سے زیادہ شدید ہوں گے۔
انہوں نے زور دے کر کہا کہ ایرانی افواج کی جوابی کارروائی نہ صرف طاقتور ہوگی بلکہ دشمن کے لیے انتہائی مہنگی بھی ثابت ہوگی۔
واضح رہے کہ "محمد رسول اللہ” کور سپاہ پاسداران انقلاب اسلامی کا اہم یونٹ ہے جو تہران اور اس کے گرد و نواح کے دفاع کی ذمہ داری سنبھالتا ہے۔
یہ بیان ایسے وقت سامنے آیا ہے جب مشرقِ وسطیٰ میں ایران، اسرائیل اور امریکا کے درمیان کشیدگی بدستور برقرار ہے اور خطے میں ممکنہ فوجی تصادم کے خدشات پر عالمی تشویش میں اضافہ ہو رہا ہے۔
