مہر خبررساں ایجنسی کے مطابق ایرانی وزارت خارجہ نے جنگ بندی معاہدے کی مبینہ خلاف ورزیوں کے حوالے سے ایک تفصیلی بیان جاری کرتے ہوئے امریکہ اور اسرائیل پر معاہدے کی خلاف ورزیوں کا الزام عائد کیا ہے۔
وزارت خارجہ کے بیان میں کہا گیا کہ 8 اپریل 2026 کو طے پانے والے جنگ بندی معاہدے کے تحت اسلامی جمہوریہ ایران کے خلاف شروع کی گئی جنگ کو تمام محاذوں، بشمول لبنان، میں روک دیا گیا تھا۔ تاہم معاہدے کے نفاذ کے بعد سے امریکہ متعدد مواقع پر اس کی کھلی خلاف ورزی کا مرتکب ہوا ہے، جن میں ایرانی تجارتی جہازرانی کے خلاف جاری کارروائیاں بھی شامل ہیں۔
بیان کے مطابق اسرائیل نے بھی جنگ بندی کی سنگین خلاف ورزیاں کرتے ہوئے لبنان کی خودمختاری اور علاقائی سالمیت کو نقصان پہنچایا۔ ایرانی وزارت خارجہ کا کہنا ہے کہ ان کارروائیوں کے نتیجے میں ہزاروں لبنانی شہری شہید اور زخمی ہوئے، جبکہ تقریباً 20 لاکھ افراد بے گھر ہوئے اور ملک کے بنیادی ڈھانچے سمیت شہری املاک کو شدید نقصان پہنچا۔
وزارت خارجہ نے واضح کیا کہ کسی ایک محاذ پر جنگ بندی کی خلاف ورزی کو پورے معاہدے کی خلاف ورزی تصور کیا جانا چاہیے، کیونکہ جنگ بندی تمام محاذوں پر یکساں طور پر لاگو ہوتی ہے۔
بیان میں مزید کہا گیا کہ اگرچہ جنگ بندی کے ابتدائی ایام میں امریکہ نے اسرائیل کو لبنان کے خلاف کارروائیاں روکنے پر آمادہ کرنے کی کوششوں کا اعلان کیا تھا، تاہم ایران کے نزدیک ایران کے خلاف جنگ بندی کی خلاف ورزیوں اور لبنان میں اسرائیلی اقدامات کی مکمل ذمہ داری امریکہ پر عائد ہوتی ہے۔
ایرانی وزارت خارجہ نے خبردار کیا کہ جنگ بندی معاہدے کی مسلسل خلاف ورزیاں خطے کے امن و استحکام کے لیے سنگین نتائج کا باعث بن سکتی ہیں، لہٰذا ان اقدامات کو فوری طور پر روکنا ناگزیر ہے۔
بیان کے اختتام پر ایران نے اپنے موقف کا اعادہ کرتے ہوئے کہا کہ اسلامی جمہوریہ ایران اپنے قانونی اور فطری حق دفاع کے تحت اپنے قومی مفادات کے تحفظ کے لیے تمام دستیاب صلاحیتوں اور وسائل کو بروئے کار لانے کا حق محفوظ رکھتا ہے۔
